Mga Balak ni Abai Genamos

Akong Pinili
By Genamos_US of Washington, DC, USA

Idayong ko ang imong kasingkasing dinhi kanako
Aron itangkil ko kanunay dinhi sa akong dughan
Dili ko buot ikaw mawala sa akong panan-aw
kay ako nahadlok nga ikaw mahanaw

Ikaw ang akong kapalaran mga akong gidamgo sa kanunay
Ikaw ang akong kalibutan ning layaw kung hunahuna
Sud-unga kanang buwan sa kagabhion nga nigilaw sa kangitngit
Mao sab ang adlaw sa kabuntagon nga nagdala sa kahayag ug kadasig
Nga kanimo naglaum ang gugma tang walay kinutuban

Mao kini ang tinuguan nga sa uban wala sila nasayod
Kay ang pagtugkad ning biyuos sa akong pagbati
Inanay sa pagbuklad aron mahimo kining gugma nga walay paglubad
Ikaw ang akong langit ning akong kinabuhi
Nga gatubo ning akong dughan

Kay kining akong kalag nagalaum kanimo sa kanunay
Nga dili mo kini hikawan ang gugma tang gi-ampingan
Bisan pa kini itukmod sa ngilit sa pagsulay
Ikaw gihapon ang akong pinili


Ang kinabuhi
By Genamos_US of Washington, DC, USA

Ang kinabuhi usa ka binilhon gasa nga gihatag gikan sa langit.
Kay kining kinabuhi nahimugma man gikan sa gugma ni Bathala
Wala ba nato makita ang matag sook nga napuno sa kinabuhi
Karon, kay dia naman kining gitawag nga kinabuhi nga nag-agad lamang sa
kaugalingon natong pagbuot
Dili nato usikan ang matag hagtok sa orasan sa pagbuhat ning atong mga
katuyo-an
Kay ang kinabuhi hamubo lamang.

Ang kinabuhi susama sa usa ka hangin nga lumalabay lamang
Magpalingpaling sa iyang direksyon kung asa kini idunggo
Ang kinabuhi sumasa sab sa usa ka panahon nga naay tingtugnaw og hulaw
Naay panahon nga kita bati-on og kahaw-ang sa kinabuhi nga wala nato tuyo-a
Ngano man kaha kini usahay modo-aw ning kinabuhi?
Naa say adlaw nga kita naghikabhikab sa katahom ug tumang kamaya.
Pero kining tanan usa lamang sa mga lamas nga gisagol sa kinabuhi sa tawo
Aron sa pagtima-an nga naay usa Diyos nga atong gi-ampoan ug dangpanan.

Ako, ikaw ug kita may kinabuhi.
Nga atong gihigugma og gi-ampingan sa kanunay
Kay kini nag-inusara og wala nay laing kinabuhi
Nga iholip pagbalik kung kini bawi-on sa kamot sa langit
Atong taga-an og higayon ang paggamit ning kinabuhi nga mabulokon
ug puno sa kalipay og paghigugma

Mahinungdanon man o kaha walay pulos ang atong pagbati ning kinabuhi
Hinumdumi kini akong higala, nga kita namugna nga may katuyu-an
Aron ang kalinaw mokayap ngadto sa atong mga kasilinganan
Kanindot sa kinabuhi nga kita nagaduwa ilawom sa kahayag sa buwan
Nga ato pang nakita ang kahayag bisan pa kini giputos sa kangitngit
Ug sa laing bahin, ang mga bidlisiw sa haring adlaw sa sayong kabuntagon nga
nagpanughit
aron kadtong yamog inanay kining pad-on sa iyang katahom

Walay makalimod nga ang kinabuhi napuno sa mga pangutana og katuyo-an
Kung unsa pa man ang atong katuyo-an ning atong dughan
Aron sa pag-ugkat sa katin-awan ning nagahasol tang galamhan
Dili nato matugkad ang ti-unay nga kahulogan sa matag unos sa kalisdanan
kay kining atong pangisip may utlanan
Ang kinabuhi napuno sa imahinasyon ug tam-is kining tagamtamon
kung kini ihangad ngadto sa langit sa walay pagduha-duha.



Ang Kawayan
By Genamos_US of Washington DC, USA

Sa akong paglingkod-lingkod sa ti-ilan ning dakong kawayan aron pagpahulay
nonot sa pagsubang sa haring adlaw
Akong nakita ang bidlisiw sa adlaw nihalok sa lunhawng mga dahon aron sa
paghatag og katahuran ning sayong kabuntagon
Ang hoyohoy sa hangin nag-iyahay sa paggakos sa matag dahon aron isayaw ang
iyang katahom.

Kung imo kining sud-ongon ang mga dahon sa kawayan murag mga lusok sa mga
luha nga nangumbitay sa iyang puno-an.
Ug samtang kining akong huna-huna nagduhiraw og walay tumong kung asa
idunggo kining akong pangisip nga gidasig sa katahom sa palibot.

Pero sa tanto nakong liraw napadpad kining akong mga mata sa mga tanaman nga
nag-alirong duol sa ti-ilan sa puno-an sa kawayan, nga nagyogpos kay wala
makatilaw sa halok sa kainit sa adlaw kay gi-agbayan sa mga anino sa
mabagang dahon sa ibabaw ning akong nahimotangan.



Kahoy ko, Kaugma-on mo
By Genamos_US of Washington, DC, USA

Sa akong pagdula-dula ning bukid kung gipuy-an dili halayo sa payag kung
natawhan
Nga akong nalantawan ang tambok nga panganod giduyan sa sabakan sa lunhawng
kabukiran
Samtang ang mga kalanggaman nag-iyahay og pagpasilong sa mga sanga sa abuhon
nga kahoy.
Nga kansang mga kaba-kaba padayon nagasayaw ibabaw sa mga bulak nga ilang
gipanipa-an.
Pagka-anindot paminawon ang mga taghoy sa kalanggaman nga gawasnon
naglupad-lupad ibabaw sa kakahuyan nga kansang bidlisiw sa haring adlaw
nag-uhap-uhap sa uluhan sa mga kahoy, nga gihabulan sa mga bagang dahon. Ug
samtang ang mga dahong laya padayon sa pagkalagas inubanan sa pagtayhop sa
huyohoy nga hangin.
Ug gipadpad padulong sa nagduka nga sapa nga kansang mga awit sa mga
kalanggaman og tingog sa dinaga-as nga tubig maoy akong nadungog.

Ug sa akong kakapoy bunga sa akong paglingaw-lingaw nidalikyat ko sa
paglingkod aron pag-inum sa balon kung tubig aron tambalan kining akong
ka-uhaw.
Samtang akong mga singot padayon nagtabisay inanay kining gitayhopan sa
bugnawng og lab-as nga hangin.
Ako nakapanghupaw sa kamingaw sa palibot ilawom ning kahoy nga akong
gipasilongan nga ang gakos sa kalinaw padayon naga-uban.
Ug dili hilayo sa akong nahimotangan ang hanay sa mga kahoy nga among
gitamom ni Tatay
aron kini makatabang sa pagpugong sa mga dinahili sa bukid ug panagang sa
mga buswak sa uwan
Aron kadtong among umahan sa ti-ilan sa bukid dili kini matabunan nga mao
ray among gisaligan.

Ug sa akong pagyanghag ngadto sa bakilid, akong nakita ang puno-an sa mangga
nga gipurong-purongan sa mga bunga ug gagmayng mga putot
Ka-anindot kining talan-awon kadtong mga kahoy nga gitanom namo ni tatay
modako og mahimo kining hingpit nga kahoy
Aron sa ugma damlag, amo kining mapuslan.

Kung wala pa kining mga kahoy nga gitamon sa akong mga katigulangan.
Wala nasay kalambuan moabot ning among kabukiran kay sa ting-usbawan kini
gihikawan.
Busa kining kahoy ato gyud kining ampingan ug taga-an dakong bili ning atong
dughan.
Kay sa kahoy ko kini gisalig ang akong bugtong kaugma-on og natong tanan.



Ang Bakak saGugma
By Genamos_US of Washington, DC

Di ba kitang tanan mga bakakon, kay ang kamatuoran sa kagahapon kay mahimo
man kining bakak sa karon. Samtang kining mga suwat nahipatik og nahilagda.
Mao sab kining atong kinabuhi nahisulat man sa kamatuoran.

Kung ang gugma nga atong gibati karon tuiga sa atong mga higala, diba lahi
man ang gugmang nga atong gibati niadtong niaging tuig. Kung dili man kini
tinood, daw usa kini ka bakak. Bisag pag atong itisok sa atong galamhan nga
kining atong buhing gugma kanunayng nagapitik.
Pero sa takna kini guroyon sa iyang kakapoy mahimo sab kining maluya.

Dili nato matagna og malimod ang mga dagway sa kamatuoran ning nagalakaw nga
panahon. Madungagan og makuha-an man kining atong pagbati dili nga gyud
mahibalik ang kamot sa mga ni-aging adlaw. Bisag pag pugson pa nato ang
atong kasingkasing sa pagpugong sa dagway sa kausaban aron kining pagbati sa
kanunayng lab-as og walay paglubad. Ang tanan ning kalibutan may utlanan og
may kinutuban. Dili gyud kini mapugngan kay sa kausaban kanunayng hilabtan.

Sud-onga kanang pagsubang sa haring adlaw sa sayong kabuntagon nga kansang
naglatagaw sa kasidlak og sa paglagbas ni-ining animo sa kilom-kilom nga
gihabulan sa kangitngit ang aping sa kahaponon, nananghupaw ang adlaw,
inanay sa pagkanaug aron sa paghatag og dakong pasigarbo sa kagabhion na
kansang kabitu-onan og ang buwan nagahari sa kalangitan. Mao sab kini ang
dagway sa kinabuhi naga-usab og naga-tuyok. Walay permanente kon dili
ka-usaban sa tanan.

Mao sab kini ang atong gugmang gibati nahisama sa usa ka salapi naga-usab
ang balor pero naay bili. Samtang ang mga bulak sa tanaman, mangalawos ug
mangalarag pero sa paglabay sa mga adlaw mahimo kining mamowak pag-usab og
mahimong usa ka putot. Pero kung unsa pa man ang dangatan sa atong gugma nga
walay kasigurohan. Kay ang bakak sa gugma mao man ang dagway sa kausaban.


Hingpit sa akong mga mata
by Genamos_US of washington, DC

Ikaw ang akong bugtong gipangadoy ning akong dughan,
Nga ang langit maoy bugtong saksi, sa walay utlanan nga pagbati.
Walay laing babaye ning ibabaw sa kalibutan ang nagpukaw ni ining
nakatagpilaw nga kasingkasing.
Akong pangayo-on kanang imong kasingkasing ug iholip kanako kining akong
dughan
Aron mo ako mahisabtan ni akong kalibutan

Dawata kini sa walay pagduha-duha kining akong gugma nga napuno sa
paghigugma
Akong nabasa sa imong mga mata nga ikaw gisapwang sa kasob-anan.
Buhi-i kanang mapait nga gakahapon og ayaw hatagi pagtagad ni-anang anino sa
pakyas mong kalipay.

Kadtong lawum nga samad nga gibilin sa maluibon mong kagahapon bisag pa kini
mahimong usa ka uwat nga kansang ni badlis sa imong kasingkasing. Dili kana
mahanaw bisag kanu-a pa man. kay kana nahilagda sa kamot sa kinabuhi
Hikalimti kanang tanan, kay ako andam modawat kanimo bisag kanus-a pa man.

Akong ipasalig kanang imong mga dungoyngoy, ako kanang hulipan sa kalipay og
katawa.
Kining tanan, akong gihalad sa langit nga kining tiunay kong pag-ampo sa
karon og unya kining tim-os kung gugma dili mo hikawan

Malitok ko man ang tanang mga tam-is nga mga pulong para lang ikaw akong
ma-angkon
Walay sukod ang akong pagbati ko kanimo, inday.
Nga akong isa-ad ngadto sa langit kining akong gugma nga walay paglubad.
Bisan wala nako ni ining kinabuhi kay sa kamot sa kamatayon ako gipili
Ako kanunayng nagauban kanimo bisan pa wala nako sa imong kiliran.

Ug sa kataposan sa tumoy ning kabalaka kining akong sinulat kung balak.
Akong ipahinongod kanimo lamang. Kay ikaw ang akong bulawanong kagahapon.
Ang akong gipangandoy na ugma. Ug ikaw ang akong karon nga nagdala og
himaya.


Akong Higala akong hinigugma
By Genamos_US of Washington, DC

Naay panahon na kita masulob-on.
Naay sab panahon na kita gisapwang sa kagul-anan.
Pero sa takna na ikaw akong makita, ikaw ang akong bugtong himaya
Og kining nagahasol na kabalaka, dali ra kining mahanaw sa akong huna-huna
kay sa imong tam-is na pahiyom kay kini pulihan

Dili matokib kining pagbati na nisangko didto sa hawanan sa akong
kasingkasing.
Kay Ikaw ang akong kahayag sa ning sayong kabuntagon.
Ug ikaw sab ang silaw sa mga bituon ning kangitngit sa kagabhion.
Ikaw ang bul-og sa mga balod na nagdala kanako didto sa babayon sa gugma.
Ug Ikaw sab ang bugnawng hangin ang migakos kanako sa akong pag-inusara.
Ang imong mga katawa daw usa ka awit sa mga kalanggaman
Ug ang imong katahom daw usa ka haring bangaw na nibadlis didto
Sa langit.


Gugma
By Genamos_US of Washington DC,USA

Ang tinood na gugma bala-anon og walay utlanan.
Na naglagiting sa kainit ning atong dughan.
Walay maka-ugdaw sa nagdila-ab na kahayag
O kaha makausab sa mga tunob sa kapalaran
Bisan pa kini gihampas sa mga balod sa kalisdanan

Ang tinood na gugma kahibalo mosangyaw sa mga tam-is na pulong.
Ug andam maminaw sa mga hagawhaw sa pagbati
Nganong atong hikawanan ang atong dughan sapag pa-ambit sa mga pahat ning
pagbati
Di ba angay kining bisbisan sa mga pag-amoma aron kini mulambo sumala sa
gitugon ni Bathala

Di ba kining Gugma gipanday sa mga kamot sa langit na gikulit ning atong
dughan
Dili nato kini pasagdan ang nagdila-ab na pagbati na napalong lamang sa
dayon
Kon dili, Ato kinig sugnuran ug mga respeto, pagsalig ug pagsabot inubanan
sa hugot na pag-ampo ngadto sa langit

Ug sa laing bahin, atong kining ihikling ang mga tunok sa pagsuway, kasilag,
pagdumot og kasakit ngadto sa kainit sa kalayo sa gugma
Kay dinhi ning kalibutan atong itisok ang binhi sa gugma aron kini motorok,
molambo, ug magahari sa atong dughan
Walay sukod ang kaanyag sa gugma kung mao kini ang magiya kanato sa paraiso
sa kalipay aron kita padayon ibanlas sa kadasig sa pagkigbugtaw ning
naglatagaw na kinabuhi


Nasagmoyo nga Kagawasan
By Genamos_US of Washington-DC, USA

Dili ba nindot paminawon, kung ang tanan tawo gawas-non nga
buhi ning kalibutan, nga walay mansa nga hulga sa pagsuway
Pero sa pagkatinood, kini bunga lamang sa atong mga pangandoy
Kay nasayod ang langit nga kini nahisukwahi sa atong mga damgo og sugo ni
Bathala

Ka-anogon sa mga nangbanaw nga dugo sa atong mga katigulangan
Nga kinsang mga Bayani ato lang nahikalimtan

Wala na ba nato madungog ang mga dangoyngoy sa mga pagdumot
Nga kansang kagawasan ila untang makab-ot pero gipugngan kini sa mga kalagot
Nalimot na ba kita, sa mga nindot na pagtulun-an nagibilin ning atong yutang
natawhan
Atong gipadayag ang mga tingog sa kagawasan nga kansang kusog og kahakog
giguyod sa langyawng mga kamot aron kita padayon lugpitan sa atong katungod

Karon, hain naman kining kagawasan nga ato untang ipadayon
Nakawang lang ning tanan ang atong mga paningkamot nga kansang tingog wala
madungog
Nga ang kansang kagahapon napuno sa kalisdanan nga dili buot okayon
Dili ba kini usa ka kina-iya sa tawo na ang subrang gawas-non mosangko sa
utlanan sa kahakog
Nga dili nato ikalimod kining tanang pagsulay, sa kanunayng naga-uban sa
atong mga kalibog

Mao naba kini ang gituho-an nga binhi sa kagawasan nga gusto natong itisok
ning atong dughan
Ayay, pagkasakit palandungon kining tanan, ang nada-ngatan ning atong
minahal na yutang natawhang kay sa kagawasan gihikawan
Wala ba nato nakita ning atong mga mata, nga atong gitugotan ang mga
adunahan nga musolbong sa pagkadatu gumikan sa mga panglimbong, panglupig og
kahakog sa gahum
Ug ang mga kabus ug timawa nga kansang nagpadayon, pagkuyanap ning kinabuhi
nahisama sa mga gapnod nagi-anod-anod sa dagat sa dakong kalisod

Igo naba kini, ang atong nakab-ot nga kagawasan nga kita gibuhi-an sa mga
langyawng mga kamot
Nga kansang nangumbitay nga kagawasan wala pa mahinog kay atong gipogos sa
pagpu-po
Wala ba kita gilamat lamang, sa atong kaugalingon nga pagtu-o
Nga kita mobarog gawasnon, taliwala ning kalisdanan
Ug wala ba kaha kita gigapos sa atong mga kamot kining atong kaugalingon nga
mga kadugo
Nga susama sa mga langyaw na igo ra kanato nagpahimolos

Ug sa walay pu-as ning akong kabalaka, ako naga-hilak og naga-ampo ngadto sa
langit na kining dughan ko napuno sa kasobo pulihan kini sa gugma kung
kalipay
Bisan pa kining akong nag-alindasay na kasingkasing gilunopan sa mga balud
sa kasagmoyo
Akong ipa-dayon sa pagsinggit pina-agi ning sinulat kung balak para
kaninyong tanan akong ipa-ambit
Ang pagpakahilum dili kini maoy tubag na makatabang aron magkab-ot kining
idlas na kagawasan sa hingpit na katumanan
Kon dili, ang inyong walay usik na pagpakabana nga maoy akong bugtong
suka-ranan sa akong himaya
Kay ang tinood na dalan sa kagawasan naggikan kini sa atong tagsa-tagsa ka
mga dughan



Silaw sa Adlaw
By Genamos_US of Washington DC.

Akong nabatyagan ang hangin nihapa sa tin-aw na tubig
Ug ang silaw sa adlaw nisi-aw sa pagsayaw sa nag-umbaw na tulay
Ug didto nako na-aninag ang silaw sa imong mga mata.

Daw usa ka handurawan na dunay nagpahipi na bag-ong tilimad-on
Kung ang batonaw mahilis mahimo kining usa ka tubig
Ug ang kainit sa huwaw mo-abot aron kini atong gugma
pahinogon sa katam-is.

Kaanindot sud-ongon ang mga bulak sa tanaman nagmaya sa tumang kalipay
Kay ang hangin sa imong mga halok nidagpis sa akong mga ngabil.
Kausa, Kaduha og walay puas ang iyang utlanan. Kay dili lang ikaw ang
nagdala ug silaw sa tim-os kung Gugma. Ug ikaw sab ang nag-inusarang haring
adlaw nagdala sa kainit ning akong dughan og sa akong nagbinugtong na
kinabuhi.


Ikaw
By Genamos_US of Washington, DC

Sa akong pag-inusara, didto sa akong lantawan. Akong nakita ang nagsubo na
berding bukid na gipayongan sa mga baga na panganod. Didto nagsugod
pagbisibis ang uwan sa kagahapon na ni subay sa dalan sa akong huna-huna.
Akong gi-ablihan ang gangha-an sa akong galamhan aron kini buhi-on pag usab
ang nahikatulog na pagbati.

Lab-as pa kanako sa akong panumduman kining tanan. Na ang una natong
panagtagbo, akong nabatyagan ning akong dughan, na kita gilamat lamang sa
mga anino sa gugma. Dinhi nagsugod ang dili matukib na pagbati. Daw Maoy
naghatag kanako og kainit ning akong dughan.

Imo kining gidasig ang akong kasingkasing sa kamaya. Ug Imo kining gipuno sa
kalipay sa wala tuyo-a na panag-abot sa duha natong ka mga mata og sa kalit
ka nipahiyum na daw ang atong duha ka mga mata nag-abot sa tumang
kahibolong.
Samtang nagsud-on ko sa imong panagway. Akong nakita na daw gikulit ang
imong mga tam-is na pahiyom, ang sidlak sa imong madanihon na mga mata,
ngabil na tumang kapuwa og aping daw usa ka Macopa.Kining talagsa-on na
higayon dili bu-ot palabyon. Ug Sa walay panaghid akong gihikap ang imong
mga kamot daw usa ka duldol, na homok hikapon.

Karon, dili naman nako mapugngan ang paglabay sa panahon. Daw lab-as pa sa
akong panumduman kining tanan. Labi na katong mga tunob sa kalisdanan na
nihulga sa pagbu-ak ning atong bala-an gugma. Bisag unsa pa man mga unos
niabot ning kinabuhi, ikaw gihapon ang akong nag-inusarang pagbati na
gimahal og gipakahari. Akong gipana-ad sa langit, kining nagkaopos na
kinabuhi na dili nako hikalimtan sa akong handumanan ang imong pagka-ikaw.



Yamog sa Kabuntagon
By Genamos_US of Washington, DC, USA.

Ang adlaw nisubang sa katahom ning sayong kabuntagon
Na gilibutan sa nagduka nga puti ug bughaw nga mga panganod
Ang bidlisiw sa haring adlaw nag-aginod sa pagpandong sa lunhawng kabukiran.
Akong nabatyagan ang huyohoy sa bugnawng hangin nga nidagpis sa akong panit
Ug ako gipugos ang akong kaugalingon sa paghanggap sa lab-as nga hangin, nga
dala ang kahumot sa mga bulak og tanaman, labi na ang mga alisngaw sa yuta
nga bag-ong gibugkal ug gibisbisan sa mga taligsik

Samtang ang mga awit sa kalanggaman nga kansang tingog mao ray akong
nadungog.
Akong gipiyong akong mga mata aron ipadayon sa pagpaminaw sa dinago-ok sa
mga balod nga nitapya ning akong dung-gan
Nikonsad sa akong hunahuna ang mga panagway sa mga bata nga nagmaya
nangaligo ug nagkalingaw naga-dula sa mga bonbon ngadto sa sabakan sa daplin
baybayon
Kanindot paminawon ang ilang mga inagiki sa ilang mga katawa nga walay
gamayng lama nga suliran sa kinabuhi.

Ug sa laing panid ning akong nagdurilaw nga hunahuna, akong na-aninag ang
mga nisarasay nga balud nga nagdali sa paghalok ngadto sa puting baybayon na
gikalingawan sa paggukod sa mga bata.
Ug sa akong pagmata akong nabatyagan ang nilabay nga kainit sa adlaw, akong
nakita ang abuhon nga payag halayo sa akong panan-aw, nagipandungan sa mga
bukton sa dagkong kahoy Nga kansang mga dahon nagmadasigon sa pagsayaw
dungan sa pag-oros sa tingog sa hangin og hampas sa mga balod. Ka-anindot
paminawon kining talan-awon nga ang kansang palibot napuno sa kamingaw og
abunda sa kalinaw nga kansang panagway sa nindot nga kabuntagon lisod kini
palabyon


Linghod na Gugma
By Genamos_US of Washington DC

Ang gugma may pasinsiya
Ang gugma sab naay kalooy
Mao sab kini ang akong gibati kanimo
Daw walay makalumpag bisag kilumsan sa pagsuway

Ang mga kutay sa kalisdanan dili buot ikahintapan
Bisag ang mga uwat sa kasakit dali ra kining mahanaw
sa pagdulhog ning panahon kay sa gugmang hilabihan kini gipugngan
Ang balud sa kahadlok imo kining gibugsay sa imong mga halok
Ug ang mga tun-og sa kahigwa-os imong gihabolan sa kainit nimong gakos

Mag-unsa nalang ang kinabuhi kung wala ka sa akong kiliran.
Na andam mosakiyo sa unos sa mga kabalaka.
Bisag sa atong kalinghod sa gugma wala ta mag-inusara
Kay sa tim-us tang gugma gihimo kitang usa ra.


Ang Pangadoy Sa Ginikanan
by Genamos_US of Washington, DC USA

Sa linghod kung huna-huna sa akong pagkabata, niadtong nilabay nga
katu-igan.
Akong gipangadoy nga makatapos sa akong pagtu-on aron maka-abag sa akong
ginikanan og igsoon.

Toud man sa paglabay sa panahon kini hingpit kung natuman kay sa akong
paningkamot, pag-ampo og kakugi akong napuslan.
Dili ma-ihap sa akong panumduman kung pila katagak sa singot og lusok sa
luha nga nibanlas sa akong panagway.
Dili sab maihap ang mga adlaw sa akong paningkamot nga ako nangandoy kung
kanus-a mosalumsom ang adlaw aron sa pagpahulay.

Ni-irog ang adlaw, ug ang tuig nanglagas ug akong kinabuhi niusbaw ug may
kakulangan.
Ug sa kalit nasab nisi-aw sa akong hunana, Nga nangandoy sa laing hugna sa
akong kinabuhi aron sa paglaraw sa kaugmaon aron kini idugang sa katam-is og
kalipay sa akong kinabuhi.
Tu-od man sa akong pagpamilok. gidungog sa langit ang tingog sa katumanan
ang damgo sa akong kinabuhi.

Samtang naglakaw ang mga adlaw, akong nakita ang nagtubo nga mga bata sa
ilang kinabuhi
Ug ako padayon sa pag-obra sa ilang mga kaugma-on ug gihikling ang tumang
kakapoy aron sa pagpadayon sa pagpalimbasog.
Kung kanus-a idunggo kining akong pangandoy, wala ko masayod kay ang bugtong
langit lamang ang nasayod.
Dili nako mapugngan ang pagdahili sa akong luha kay ang tutaligsik sa ilang
mga panagway nga nagmaya ug walay igong kasayoran kung kanus-a mo-uwan ang
kamatuoran sa akong mga damgo.
Kung bawi-on man ni Bathala ang akong kinabuhi sa walay pananghid. Ug sila
wala maka-andam sa pagdawat ang ka-aslum sa kamatuoran aron hukasan sa ilang
pagkalinghod ug mahigmata sa ilang kahuyang.

Sa nagka-upos ning pabilo sa akong kinabuhi ug kadtong mga sa-ad og damgo
nagpaabot sa ilang katumanan. Ako, nahigmata kay nakalimot sa paghanggap sa
kaugalingong kung kalipay.
Bugtong himaya ning akong dughan sa kanila mahinomduman kadtong mga kidlap
sa mga panghitabo nga sa among panag-uban, sa mga katawa og kalipay og
kasakit, ug sa mga matag-inagiki sa mga pasi-aw. Dili unta nila hikalimtan
ang pagsiksik sa mga bulawanon pagtulon-an, ug mga maayong buhat, ug
panag-ingnan ug sulondong kina-iya aron ipadpad ngadto sa tul-id nga dalan
aron sa paghimaya sa ngalan ni Bathala aron mouban ang grasya ug kalooy nga
ilang mabatonan ang kinabuhing haruhay,malinawon ug napuno sa paghigugma
aron mahilikay ug dili madimdim nila ang apdo sa kalisdahan ug pagsuway.



Ang Pana-ad sa Gugma
By Genamos_US of Washington, DC, USA

Imong gihikap ang akong kamot
Ug atong duha ka mga mata nanag-abot nga wala tuyo-a
Imo kung gitutokan ug akong kasingkasing
Nag-alindasay sa pagpitik nga walay pu-as sa kakusog

Akong gisubay ang matag badlis og kurbada sa yano mong panagway nga gikulit
ni Bathala
Gianod mo ako, sa pagpaduol dinha kanimo kay gilamat sa gilak sa imong
panan-aw.

Akong nabasa ang mga pagbati natong duha kay sa gugma kita gi-amoma
Ug sa walay pananghid sa kalit ikaw akong gibugkusan ning akong mga bukton
Aron sa paghatag og katahuran sa init kung mga gakos
Ug ikaw nagpauraray susama sa mga balod gawasnon nga gitapya sa mga hangin
padulong sa babayon
Ug sa pagdunggo sa imong nawong dinhi sa akong dughan.
Nitulo ang mga luha sa kalipay nga nisubay sa imong mga aping.

Imong nadungog ang mga awit sa gugma nga padayon nagmaya sa lawak ning akong
kasingkasing
Akong gihagawhaw kanino hadu-ol sa imong dung-gan ang mga pulong sa gugma
nga dugayng nakong gitapigan sa akong pag-inusara

Akong gipanumpa sa langit og gisa-ad kanimo nga ikaw ra ang akong higugma-on
hangtod sa akong kamatayon.
Ani-a ako,nga andam mopangga kanimo og alagaran ta ning gugmang walay
utlanan.
Akong gipangdoy ning kinabuhi nga ikaw akong ika-uban hangtod sa atong
katigulangon.